Agentsprell

  Forslag til ulike agentsprell

• Agentsnapping! Ringleik, halvparten av agentane sit på stolar, alle har ein partnar bak seg som er livvakta deira. Alle livvakter har ein agentpartnar på stolen framfor seg, bortsett frå éin. Denne livvakta skal snappe agentar frå dei andre ved å blunke med auget/gi eit anna avtalt teikn til agenten han vil snappe. Dersom livvakta når å ta tak i skuldra til agentpartnaren sin, blir han/ho ikkje snappa, og jakta går vidare… Dersom agenten blir snappa, har ikkje livvakta vore merksam nok, og då er det den sin tur til å prøve å snappe ein agent ved å blunke til ein av agentane som sit i ringen…

• Agentstrekken. Mål: Slappe av og roe ned. Tidsramme: 3 minutt.

Stå med beina litt frå kvarandre og ein liten knekk i knea. Løft skuldrene heilt opp til øyra, og hald dei der i 5 sekund før du lar skuldrane falle ned. Gjenta 2 gonger. Så rullar du skuldrane roleg bakover før du fell roleg framover slik at du står bøygd med hendene hengjande ned mot bakken/beina. Reis deg roleg opp igjen ved å rulle ryggvirvel for ryggvirvel. Plasser til slutt hovudet på toppen, og rull skuldrane bakover før du pustar høgt og djupt inn og ut éin gong.

Ein leiar må leie strekken ved å stå framme og vise, samstundes som han/ho instruerer roleg (etter idé frå Liturgisk verkstad med born. Kfuk/kfum).

• Gloriabølga. Tidsramme: 1 minutt

Mål: Få eit kort avbrekk, løyse opp stemninga, riste laus.

Ein leiar står framme og instruerer. Spør om nokon veit kva Gloria betyr (Ære være Gud eller Takk, Gud).

Alternativ 1: Alle bøyer seg ned, med hendene hengjande ned mot golvet. Så tek alle til med å riste med armane og småspringe på staden medan dei ropar «Glooooooo-ria!» Når ein kjem til «-ria», sprett alle opp med hendene opp mot himmelen/taket.

Alternativ 2: Alle står med hendene ned, men kroppen vanleg/opp. Så tek alle til å riste med armane medan dei ropar «Glooooooo-ria!» Når ein kjem til «-ria», slengjer dei som står til venstre, armane opp mot taket, dei som står til høgre for dei slengjer armane opp rett etter, og så slengjer dei til høgre for dei igjen armane opp, osb. Når denne rørsla blir gjort raskt, ser det ut som ei bølgje som reiser seg bortover mot høgre (etter idé frå Liturgisk verkstad med born. Kfuk/kfum).

• «Finn hemmeleg agentpost». Ringleik. Alle agentane står og held kvarandre i hendene. Ein agent står i midten av ringen og har eit spesialoppdrag; å finne ut kvar posten er! Posten er eit handtrykk som berre kan sendast vidare når du har fått det. Agentposten blir send ved at éin agent seier namnet og/eller agentnummeret til ein i ringen som skal motta posten. Dette skal seiast høgt og tydeleg før agentposten/handtrykket blir send. Så seier han/ho «Sendt» når den som står ved sida av har fått eit diskret handtrykk. Kanskje er spesialagenten så observant at han/ho klarer å sjå handtrykket idet det blir sendt? Då er det avsendaren som må i ringen for neste spesialoppdrag. Alle agentar skal så diskret som mogleg sende vidare handtrykket til den ved sida av, utan at spesialagenten oppdagar det. Den som blir avslørt idet han/ho sender post, må inn i ringen som spesialagent. Når den som er blitt annonsert som mottakar har fått handtrykket/posten, seier han/ho: «Motteke». Då er det denne agenten som skal sende vidare ein hemmeleg agentpost til ein av dei andre.

Utskriftsvennlig versjon